Hversdagsleiki

Kæru bloggvinir

Þá er enn ein vikan liðin. Þessi var bara nokkuð venjuleg. Vinnan komin á fullt og ekki mikið gert annað en að vinna, borða og sofa. Frúin hefur verið svo einstaklega heppin að það er vegavinna á smá kafla á leiðinni í vinnuna. Það er svo sem ekki í frásögur færandi nema að það er rosalega mikil traffík þarna og þeir eru alltaf að vinna þegar mest traffík er. Þetta þýðir að það getur tekið 1 1/2 - 2 tíma að komast til og frá vinnu. Það tekur venjulega 45-50 mín. Þetta er venjulega skárra á morgnana ef manni tekst að keyra snemma. En þetta nær náttúrulega ekki nokkurri átt. Svo á þetta örugglega eftir að taka tímana tvenna. Þó þetta sé bara stuttur kafli sem þeir eru að gera við. Vandamálið er nú líka að það er eiginlega ekki hægt að fara neina aðra leið. Það tekur allavega ekki minni tíma. Svo við vonum bara að þeir verði snöggir að þessu. Vinnan er nýflutt og það er ennþá verið að hengja upp myndir og ýmislegt. Það er bara einn karlmaður á vinnustaðnum, svo konurnar bjarga sér sjálfar með borvélar og hamar. Það þykir nú óvanalegt hér á þessum hluta Jótlands. Það er víða mjög klassísk verkaskipting kynjanna.  

Bóndinn tók sig til í vikunni og setti inn fullt af nýjum videoum á youtube.com. Endilega kíkið. Það er eitt sérstaklega skemmtilegt þar sem Auður Elín er að rabba við Maju Elísabet. Maja er að verða 2 ára og þær standa svona á móti hvor annarri og eru eitthvað að spjalla saman. Þetta var tekið í afmælinu hennar Auðar. Það er auðveldast að finna nýjustu myndböndin við að kíkja á dagsetningarnar. Það verður rosa gaman að eiga þetta þegar þær eru orðnar eldri. Annars vorum við ferlega óheppin. Gummi geymdi öll myndbönd og ljósmyndir inn á hörðum disk. Svona svo maður myndi nú ekki týna þessu ef tölvan bilaði. En þá bilaði þessi harði diskur, og allar myndirnar eru farnar til spillis. Við fundum sem betur fer helling af þeim inn á gamalli tölvu. Svo það eru mest myndir af Auði sem eru glataðar. En við verðum að leita betur og sjá hvort við finnum ekki auka eintak af þessu einhvers staðar. Myndirnar af sviðahausunum koma svo fljótlega hér inn á bloggið. Eins gott að nágrannarnir sáu ekki aðfarirnar.

Sú stutta er annars alltaf á útopnu. Við fórum í mæðrahóp í gær. Við hittumst ennþá svona einu sinni í mánuði. Auður var auðvitað upp á öllu og út um allt. Það eru tveir ársgamlir strákar í hópnum og annar þeirra er voða líkur Auði, alltaf eitthvað að brasa. En þetta var voða fínt. Rosalega gaman að sjá hvað þessi kríli þroskast hratt. Við skelltum okkur svo til Kolding eftir hádegið. Við þurftum að sækja borvél sem við sendum í viðgerð. Vonandi að þetta hafi verið lagað almennilega. Í leiðinni kíktum við á Gunnþóru og Maju. Það er alltaf mjög gaman.

Nú er svo von á gestum. Tengdó kemur á morgun. Við tökum frí í vinnunni til að ná í hana. Hún flýgur á Billund. Hún ætlar að vera hér í 2 vikur. Svo hringdi móðir mín í fyrradag og hún ætlar að skella sér hingað í nokkra daga í lok mánaðarins. Það verður aldeilis fjör á bænum þá. Finnst allavega mjög líklegt að Auði Elínu leiðist ekki, þegar báðar ömmurnar eru komnar að dekra við hana.

Við skelltum okkur svo í sund í morgun. Við höfum verið allt of löt við það í sumar. Auði fannst þetta rosa gaman. Við ætlum að drífa okkur í ungbarnasund aftur í vetur. Það byrjar núna í byrjun september. Alveg nauðsynlegt að halda þessu við. Ef maður er ekki í einhverju svona prógrammi, þá kemur maður sér síður af stað. Svo er líka bara gaman fyrir hana að vera með öðrum börnum. Manni finnst alveg ótrúlegt að fyrir ári síðan þá vildi hún helst ekkert vera í vatninu. Nú finnst henni þetta rosalega gaman.

Á morgun á svo húsbóndinn afmæli. Hann er voða spenntur að fá pakka. Hann vill nú minna tala um hvað hann verður gamall! En ef maður er ungur í anda, þá getur varla skipt máli hvað fæðingarvottorðið segir.

Jæja best að fara að koma einhverju í verk áður en ungfrúin vaknar að miðdagslúrnum.

kveðja

Gummi, Ragga og Auður Elín